घटना र कथा
त्यो यूवकको मृत्यु ,
तिम्रो लागि एउटा घटना
अनि मेरो लागि एउटा कथा
बिमान दुर्घटना मा परेर मृत्यु हुने
तिम्रो लागि एउटा स्वभाविक घटना,
मात्र एउटा घटना !
मेरो लागि
धेरैको जीवनसँग गाँसिएको
अपूरनीय क्षतिको
पिडादायक कथा !
एउटा गरीब बाउको
दिन-रातको दु:खबाट
सपनाको चित्र
प्रतिबिम्बित भइरहेको बिपनाको
भत्केको कथा!
बिमान चालक बनेर
उडेको पहिलो दिन
र अन्तिम साँसको कथा!!
रोइरहेछु म,
मेरो रोदनको यो उत्तर-
तिम्रो आँखालाई,
आश्चर्यमा
मलाई हेरिरहेको तिम्रो आँखालाई ।
तिम्रो लागि मात्र एउटा घटना
मेरो लागि अर्को कथा
दु:खको!!
लेखक:- प्रलेन्द्र प्रजापती |
